বিশ্বৰ প্ৰথম হাস্পতাল ৰে’লে ত্ৰিপুৰাত আগবঢ়ালে কেইবা হাজাৰো ৰোগীক চিকিৎসা

বিশ্বৰ প্ৰথম চিকিৎসা ব্যৱস্থা থকা ‘লাইফ লাইন এক্সপ্ৰেছ’ বা ‘জীৱন ৰেখা এক্সপ্ৰেছ’ নামৰ ৰে’লখনে ত্ৰিপুৰাৰ অতি দুৰ্গম অঞ্চলৰ লোকসকলক চিকিৎসা সেৱা প্ৰদান বাবে চাওৰাইবাৰী ষ্টেচনত উপস্থিত হৈছে৷ বৰ্তমানলৈকে ইয়াত ১,০০০ৰো অধিক ৰোগীক বিনামূলীয়া চিকিৎসা প্ৰদান কৰা হৈছে৷ এই হাস্পতাল ৰে’লখনৰ যুটীয়া অধীক্ষকজনে জনোৱা মতে, প্ৰথম দিনটোতে ৪০০ ৰোগীক চিকিৎসা সেৱা আগবঢ়োৱা হয়৷ আৰু দ্বিতীয় দিনা ৬০০ জন ৰোগীয়ে চিকিৎসা গ্ৰহণ কৰে ৷

উল্লেখ্য যে, এই হাস্পতাল ৰে’লখনত চিকিৎসা সেৱাৰ লগত জড়িত বিভিন্ন প্ৰয়োজনীয় ব্যৱস্থা যেনে- ডায়গ্ন’ষ্টিক, উকৃষ্টমানৰ ঔষধ আৰু ততাতৈয়াকৈ অস্ত্ৰোপ্ৰচাৰ আদি উপলব্ধ ৷ আনহাতে, যুটীয়া অধীক্ষকজনে ইয়াকো জানিবলৈ দিয়ে যে- চকু, অস্থি ৰোগ, মুখৰ কেন্সাৰ, স্তন কেন্সাৰ আদি অস্ত্ৰোপ্ৰচাৰৰ সুবিধা ৰে’লখনৰ ভিতৰতে আছে৷

আনহাতে, উত্তৰ ত্ৰিপুৰাৰ মুখ্য চিকিৎসা বিষয়াজনে জনোৱা মতে স্বাস্থ্য বিভাগৰ ১১জন কৰ্মচাৰীয়ে এই ৰে’লখনত ৰোগীসকলক চিকিৎসা প্ৰদান কৰাত সহায় কৰে৷ চাউৰাবাৰী অতিৰিক্ত ষ্টেচন অধীক্ষক প্ৰশান্ত ভট্টাচাৰ্যই কয় যে- এই ৰে’লখন ত্ৰিপুৰাত ১৬ ডিচেম্বৰত উপস্থিত হৈ ৬ জানুৱাৰী ২০১৯ পৰ্যন্তলৈ স্বাস্থ্য সেৱা প্ৰদান কৰিব৷ উল্লেখযোগ্য যে, ১৯৯১ চনৰ পৰা ‘লাইফ লাইন এক্সপ্ৰেছে’ বা ‘জীৱন ৰেখা এক্সপ্ৰেছে’ দেশৰ ২০খন ৰাজ্যৰ ১৮৪ জিলাৰ ১০ লাখ লোকক চিকিৎসা সেৱা আগবঢ়াই আহিছে৷